« 返回前頁列印

即巿股評 | 2020-02-10 13:24

【盤房來料】港視失免費電視牌照反得福

放大圖片

美國上周五結束四日升勢,三大指數回吐,港股當晚夜期跟ADR都腳軟,今早喺新加玻黑期曾回落至26800水平。雖然武漢肺炎疫情持續,確診個案有增無減,連聯儲局上周五都發表報告,指武漢肺炎對美國經濟帶嚟新風險,認為「近日疫情爆發恐衝擊中國,其影響將蔓延到全球其他經濟體。」報告並警告,中國企業及金融領域顯得脆弱,令該國容易受到不利發展所拖累。呢個報告一出,再度勾起市場對疫情憂慮。不過港股呢邊裂口低開後,跌幅收窄,暫時仍守住二萬七關,睇嚟又有維穩資金托市。

恒指低開312點,其後最多跌359點,見27044點半日低位。其後內地公布CPI按年增長5.4%,較預期高,市場無擔心過係滯脹,反而解讀作經濟未受到嚴重打擊,阿Man都吹佢唔漲。大市因此收窄跌幅至89點,一度高見27314點。其後內地股市再走軟,恒指中午報收27193點,跌211點;國指則跌81點,報收10623點。

重磅藍籌股個別發展,上周本地市民唔單止搶口罩及消毒清潔用品,就連廁紙同盒裝面紙包裝紙巾都唔放過,擔心供應緊張而瘋搶囤貨,咁樣就帶動恒安國際(01044)呢隻廁紙股,成為半日升幅最大藍籌,半日升3.6%。至於半日跌得最多係申洲國際(02313),半日跌3.5%,呢期仲邊鬼有人消費買衫褲,申洲跌都好正常。反而跌幅第二大藍籌蒙牛(02319)跌2.9%有啲無辜,皆因牛奶都算係日常必需品,話唔定遲吓就有人瘋搶牛奶,反而乳品銷情應該唔會有太大影響,若然蒙牛守得住29.7元,即250日線,可以考慮吼位買番啲。

目前中國內地唔少城市,包括上海及北京嘅多個住宅小區,都已採取「封閉式管理」,關閉社區內所有非生活必需嘅公共場所,居民亦必須於公共場所戴口罩,盡量減少外出活動,亦應拒絕參加聚會及集體活動。由呢啲一線城市採取嘅措施,可見疫情喺內地持續惡化,暫時仍未受控,股市目前嘅跌幅,未能反映疫情嚴峻。

內地一邊管制住宅小區活動,以防止疫情進一步擴散,但另一邊廂,內地交通運輸部發布通知稱,推動重點項目盡快開工,加快項目審批,即係基建大型項目唔停得,繼續要靠基建谷內需,水泥及基建股逆市做好,整個板塊錄得1至5%升幅不等。

至於手機設備股就有啲棘手,皆因內地廠房復工未許樂觀,iPhone兩大組裝廠商鴻海及和碩未知幾時能回復正常生產,產業鏈供應隨時受影響,手設股普遍向下。零售餐飲股更大鑊,本地一個確診個案,患者跟18個親友打邊爐,超過半枱人中招,出街聚餐成高危,本來內地已唔鼓勵。之前海底撈(06862)已暫停內地分店營業,依家輪到九毛九(09922)全線分店停業至另行通知,呢個板塊暫時傷亡慘重,亦未到撈底時候。

留家消費概念股香港電視(01137):半日勁升23%,成交超越電視廣播(00511),當年港視未獲發免費電視牌照,轉行搞網購,連TVB都要學番轉頭,家陣可以話係本地薑網購一哥。1月訂單總商品交易額3.38億元,按年增長49.56%。2月首9天的增長動力及營運狀況均較1月同期更強,預期此增長動力將延續至整個2月。此外,集團老闆出錢出力為港人,高價買入口罩生產線,希望盡快能投產供香港人使用,單係呢個舉動,已深得人心。至於ATM今日見回吐,暫時美團(03690)表現較差,暫時守住100日線,小心呢個支持位不容有失。

麥狄文
(徐狄怡‧證監會持牌人)