« 返回前頁列印

港股直擊 | 2019-12-27 12:52

【盤房來料】憧憬人行降準 港股上破二萬八

放大圖片

華爾街喺boxing day大拆禮物,美股三大指數又創收市新高,雖然美國11月新屋銷售、耐用品訂單等數據差過市場預期,但數據無減投資者對美中貿易關係改善嘅憧憬。中國國務院關稅稅則委員會公布,自明年開始,降低859項商品的關稅,當中包括內地需求較為殷切的冷藏豬肉、藥品原料、高新技術產業設備等,總額估計超過3000億美元,投資者對消息反應正面。而侵侵亦表示,中國已準備好簽署首階段貿易,好消息令美股破頂再破頂。

美股強勢,再加上市場憧憬中國人民銀行最快今晚下調存款準備金,而內地工業利潤按月轉正數,港股唔單止高開,更加有心有力高走,即使周末前夕,仲要下周有元旦假期,今早半日有400億元成交金額,都算係咁。恒指高開169點,報28033,升幅曾縮至136點,見28000點半日低位,但內地公布工業利潤強勁,大市動力增強,最多升361點,見28226點半日高位,再創7月30日後最高。恒指半日收報28193點,升329點;國企指數中午則報收11183,升147點。

國務院總理表示,為咗緩解小微企業融資難、融資貴的問題,將進一步研究採取降準及定向降準、再貸款及再貼現等多種措施,降低實際利率和綜合融資成本,並指內地會加大對中小銀行支持貸款所需的資訊共享,促進大中小銀行形成服務小微企業的合理分工機制,期望中小銀行增加小微貸款比重。比起美股新高又新高,呢個消息對中港股市更有利。

騰訊(00700)呢期做番大市火車頭,半日升1.8%,報收383.6元,上破380元向400元挑戰,不過400元阻力大,樓上蟹貨多,依家再追貨博十幾廿蚊,值唔值得見仁見智,但有貨當然可以坐穩繼續等。

隔晚美股科網股表現出色,今日呢個板塊喺港股亦有理想表現,巨頭阿里巴巴(09988)創上市新高213.6元,中午報收212.8元,升1.1%,市值已超過4.55萬億元。其他5G概念股及手機設備股有追捧,瑞聲(02018)跟舜宇(02382)分別升2%及1.6%。而今日阿Man喺另一平台推介嘅京信通信(02342)更追落後升8.4%,其他5G概念股閒閒地升2%以上。

而內房股及水泥股繼續拍住上,普遍升幅至少2%,龍頭海螺水泥(00914)更升逾4%。相對陀地地產股,仍受本地社會運動影響,早兩日平安夜唔平安,聖誕假期亦唔見得商場生意好咗,陀地地產股及收租股逆市下跌。所以話阿Man之前叫揀內房股,陀地地產股避之則吉,並唔係馬後炮。

麥狄文
(徐狄怡‧證監會持牌人)