« 返回前頁列印

國際財經 | 2019-12-11 17:28

【環宇搜股】上升水位唔多續等市跌

放大圖片

美國上周五公布的非農靚爆鏡,當晚美股即狂挾,周一及周二美股回落,但隔晚標普收3132,距離歷史高位3154點,只相差21點或0.7%,在市場能見度唔高下,上升水位依然唔多。

尤其11月非農新增職位達26.6萬個,遠比市場預期的18萬份高47.8%,有分析認為今晚聯儲局言論可能會偏鷹,一來非農確喺勁,二來美股挨近高位,未理由再放鴿進一步挾高過市,最後是可以顯示出聯儲局唔受美國總統特朗普指揮,顯示當局獨立嘛。

除咗聯儲局議息,當然還有英國大選及歐洲央行議息等等,但對中美貿易談判死線,上述兩項重要性明顯較低,市場消息四處飛,好的有美國農業部長稱不認為周日將落實對中國加徵關稅的措施,市場更傳中美推遲生效新關稅;但白宮貿易顧問卻指,未跡象表明新關稅不會實施,或者中美不會達成貿易協議;同時有傳中國政府已下令,要求所有政府部門和公共機構在3年內撤下外國電腦設備和軟體。

究竟開大定開細,確實真喺木宰羊,以最樂觀睇,假設中美達成首階段協議,但按目前納指預期20.2倍市盈率(圖一),即過往十年兩個標準差,其實算喺好消息盡出,換個角度諗,若果單刁撻Q開細,按目前市場樂觀高漲下,掟到七彩亦唔出奇,所以都喺貿談死線近,離場最穩陣。

更何況,本港水緊持續,1個月同業拆息現處2.5厘,雖然年尾例牌水緊,但過往拆息上升對港股唔喺件好事(圖二),故此儘管港股今日抽升208點,依然唔喺重注買貨的時候,尤其美團(03690)已見北水連續兩日淨走,安踏(02020)、李寧(02331)、海底撈(06862)及頤海(01579)等強勢股走勢亦似轉曳,確喺要提高戒心。

美股150線下吼兩雲計算

現時最好是等調整,尤其靜待標普500指數回調至150天線(現處2965點)樓下,即比隔晚收報3132點回調5.3%,首選雲計算,例如半新股搞雲網絡安全的CrowdStrike(CRWD),因為股東有谷歌母公司Alphabet旗下的CapitalG,還有集團向分析員表示2021財年有望虧轉盈,更重要是索羅斯前軍師,大鱷德魯肯米勒(Stanley Druckenmiller)上季也落疊。

還有可留意Cloudflare(NET),同樣亦是半新股,同樣亦是雲網絡安全軟件,針對阻止網絡黑客攻擊、垃圾郵件等等,上市前更已吸引富達、CapitalG、微軟、高通及百度投資,但股價正處調整,只有美股急跌,上述兩股調整夠深,屆時絶對值得吸納。

編按:作者尹德政(Ricky),醉心投資美股近十載,最大滿足感來自尋找抵買有實力的世界行業領袖,每逢周三、五在「信報網站」及「港股360」撰文,另每逢周二在《信報》撰寫「政觀其辯」。

[email protected]

圖一:納指預期市盈率

圖二:恒指(上圖)與1個月同業拆息(下圖)