« 返回前頁列印

港股直擊 | 2019-06-27 13:32

【盤房來料】手設股科技股暫可鬆一口氣

放大圖片

「特習會」已敲定時間,加上美國財長已表示中美雙方至少有九成協議已完成,更認為有途徑可完成。呢個消息已推動美股隔晚走高,不過市場對下月減息有所降溫,即使減息幅度亦較之前預計嘅0.5%為低,美股收市並未有延續升勢。不過今早中國公布規模以上工業企業利潤回復增長,推高港股喺期指結算人高走。

恒指高開130點後,升幅一度收窄至65點,曾見過28287點半日低位,其後內地股市發力,港股亦成功收復50日線(28345),升幅擴大超過300點,最多升331點,見過半日高位28553點。中午恒指報收28542點,升320點;國指報收10906點,升140點。

四大內銀股半日再升1.2%至1.8%,維穩資金繼續支持,而受內地私募基金突然關閉醜聞影響嘅招行(03968)半日反彈2.3%。除咗內銀股,其他中資金融股亦有資金追捧,平保(02318)跟國壽(02628)分別升1.6%及2.5%;而中資券商股反彈力更強,整個板塊閒閒地升2%以上。就中資金融股而言,阿Man較為睇好內險股跟內地券商股,始終A股有阿爺撐腰,呢兩個板塊點都有着數。至於內銀股要硬食不良貸款比率上升,國家又有任務要內銀支持小微企批貸款,明知小微企壞帳風險高亦要頂硬上,內銀股前景如何,大家心裡有數,識揀自然要避一避內銀,寧取內險跟內地券商。

中美貿易戰有望結束,雖然暫時仍有好多細節要協調,但雙方關係緩和,美國本來對內地手機設備及科技企業窮追不捨,暫時呢類企業可鬆一口氣,今日相關股份彈力亦不俗。至於之前一直無厘神氣嘅濠賭股,喺暑假旺季來臨前,開始又落鑊,板塊內股份普遍上3%或以上。只係濠賭股上面蟹貨唔少,而今日唔少股份反彈已接近阻力位,不妨等突破阻力再追貨。

另外,喺貿易戰期間一直跑贏大市嘅食品股,今日則個別發展,而剛公布業績嘅優品360(02360),今日似乎跌得有啲冤枉。睇真啲盤數,集團扣除一次性上市開支後,純利其實增長高達34%,業績表現絕對唔失禮,不過市場有少少錯重點,只係睇收入按年增長近兩成,而忽略咗純利增長強勁。值得留意係,喺整體經濟環境麻麻嘅情況下,公司嘅毛利率錄得1.9%增幅至33.7%,反映公司營運有所進步,主要係集團喺採購方便價格具競爭力,而產品亦能吸引顧客,呢兩方便都愈做愈好。優品360都算交出一份唔錯嘅業績,今日股價逆市跌15%有啲跌過籠,預期股價喺2.5元應有支持,嚟到呢個位或者可以博反彈。

麥狄文
(徐狄怡‧證監會持牌人 滙盈資產管理‧董事總經理)