« 返回前頁列印

港股直擊 | 2019-04-17 17:57

【環宇搜股】3D感測銷售旺 舜宇要望多眼

放大圖片

人行頂咗十八日唔做逆回購,終於捱唔住,昨日開閘掟400億元人民幣重啟,水到自然渠成,正如昨日筆者在信報另一個專欄《政觀其辯》劇本,只要重啟逆回購,中港股市會迅速翻生,恒指上日倒升319點,雖然今日好淡拉鋸,惟後市依然審慎樂觀。

軟銀債開賣掃光 三連升展強勢

後市樂觀原因有五個,首先內地上季經濟增長達6.4%,比市場估計的6.3%勁,其次暫時公布的美企第一季業績較想像中好;風險指標日圓再度貶穿112元兌一美元,甚有機會撲向113邊,加上金價連1280美元都失守,最後亦是最有啟示性的,就喺五年期歐豬國希臘,依然比全球最安全資產美債,同樣五年期的債息低,暗示全球願意冒風險程度仍高漲。

筆者深信有力變身成亞馬遜級股王的軟銀,未等UBER上市就發威,因5000億日圓債(折合350.4億港元)周一開始認購即被市場掃清光,帶挈軟銀ADR上周五開始連升三日,累升9.5%,今日在日本回吐1.5%,相信只喺升勢過急作回調,中線仍睇60美元。

內地四個板塊宜避開

風險胃納大增,但內地行中國特色社會主義經濟,某類別的股份就算幾旺都好,最好就遠觀而不可褻玩焉。例如本欄一貫立場建議唔好掂的燃氣股,突然浙江調整天然氣門站價,整個板塊即全線碌低。

另外三個板塊亦可望少幾眼,分別為電力股、藥股及教育股,由於電價左右各行各業盈利,尤其經濟唔多好下,想加電價都難(燃氣股仍面對相同問題),而藥股及教育股均涉民生問題,阿爺唔會咁易比市場話事,所以可睇少眼慳番啖氣。

舜宇3D感測業務勢爆發

光學龍頭舜宇(02382),早前獲多間大行唱好,預計下半年鏡頭模組業務毛利率復甦,齊齊上調目標價,一度重返紅底股,上周四一度高見109.6元,但放完煙花就歸於平淡,股價連跌五日,今日收報98.3元,比上周高位唔見一成。

本來筆者對今年舜宇相當審慎,主要是全球手機銷售增長轉弱,但望到3月銷售數據,以3D感測為主的光電產品,上月出貨量按年大升6.2倍至530萬件,立即對舜宇前景改觀。

若熟識手機產業,3D感測現時以蘋果系手機為主,舜宇只做Android機,但集團3D感測大增,意思即喺話Android系未來會大幅採用3D感測,龍頭舜宇睇來未來接單會接到手軟,由於市場未有關注到這點,故此相信舜宇盈利增長或被低估。

再者,汽車業進入電動車新時代,車載鏡頭成為自動駕駛的必需品,單是上月舜宇相關產品出貨量按年升30.5%,保持一哥地位,考慮股價已回落,吼在現水平買入,暫時睇120元,穿90元就止蝕。

編按:作者尹德政(Ricky),醉心投資美股近十載,最大滿足感來自尋找抵買有實力的世界行業領袖,每逢周三、五在「信報網站」及「港股360」撰文,另每逢周二在《信報》撰寫「政觀其辯」。

[email protected]