« 返回前頁列印

即巿股評 | 2019-04-09 13:12

【盤房來料】大市有望回補去年六月下跌裂口

放大圖片

本來中美貿易談判傾得好地地,雙方都表示談判已接近尾聲,只差簽字落實協議,同埋嚟個特習會咁就功德完滿。偏偏美國又玩嘢,表示要對中國光伏產品進行337調查,又難怪中國表示不滿。中美談判家下有無阻滯都未知,但市場對此卻毫無反應,雖然隔晚波音股價跌逾4%,拖累道指下跌,但標指已八連升,納指亦錄得進賬。中港股市同樣無乜反應,半日照樣有得升。

恒指今日低開11點後,一度低見30018點半日低位,但30000點支持不俗,再加上內地股市亦甚為硬淨,港股止跌回升,一度曾倒升144點,見半日高位30222點,創近10個月高位。中午恒指報收30169點,升92點;國指則升27點,報收11820點。恒指再度逼近去年6月所遺下嘅巨大裂口底部30259點,只要呢個裂口順利回補,港股可以話一帆風順,有望向上挑戰30800至31000點,只不過要更上一層樓,定必要衝破30200至30400點呢個阻力。

早兩日內地通訊股有沽壓,但今日5G概念股卻有追棒,中國鐵塔(00788)高處未算高,再創2.14元上市新高,半日報收2.11元升4.4%。中通服(00552)跟中興通訊(00763)分別升5.7%及6.3%。除咗5G概念之外,手機設備股續有追棒,舜宇(02382)重返紅底股後,升勢有餘未盡,半日再升近3%;而噚日唔多行嘅瑞聲(02018)半日升逾5%。不過阿Man認為主打鏡頭生產嘅舜宇較可為,皆因新款電話嘅鏡頭配備愈玩愈勁,雙鏡頭唔夠,搞夠四個鏡頭,再唔係前後夾埋玩夠六個鏡頭;反而新款電話未見有特別升級語音系統,始終瑞聲都係蝕底少少。

至於地產股此起彼落,內房股做好,半日閒閒地都錄得2%升幅,融創中國(01918)更再創新高,半日升3%。不過陀地地產股繼續回吐,陀地地產股全線逆市回軟,但跌幅有限,只跌0.1%至0.7%。

阿Man一直都話醫藥股中長線仍可睇好,尤其主打藥物研發嘅龍頭巨企,值得逢低吸納,今日醫藥股發力,中生製藥(01177)升逾4%,係藍籌股升幅冠軍,而石藥(01093)亦升2%,呢兩隻龍頭一向都係阿Man心頭好,至少其他醫藥股以半新股康希諾生物(06185),半日升7.4%。但係噚日急升嘅金斯瑞(01548)真心唔敢高追,始終其估值唔係便宜,寧願買大唔買細。

唔少人問幾間大行都睇好嘅吉利汽車(00175)點睇,除咗汽車業庫存過高嘅情況已見改善,回復健康水平,無需要以割喉式減價賤賣求售,配合未來刺激汽車業措施出台,吉利今明兩年盈利有望改善,難怪大行紛紛轉軚,將吉利評級調升至「買入」。不過今日吉利高開即回軟,18元似有阻力,無貨喺手寧願等破位先追貨。

麥狄文
(徐狄怡‧證監會持牌人 滙盈資產管理‧董事總經理)