« 返回前頁列印

國際財經 | 2018-11-02 18:28

【環宇搜股】企定定喺度 乜都唔駛做

放大圖片

「政治上沒有永遠的朋友,也沒有永遠的敵人」,做慣真人騷的美國特朗普,當然深明此理。上任無耐,曾經大大聲講與中國國家主席習近平是朋友的侵侵,失驚無神可反轉豬肚,今年同習主席絶交,表明心跡講大家不再是朋友。

眼見共和黨中期選舉大鑊之制,昨日面曚曚打俾習主席求和,自以為攞到少許甜頭,立即放上Twitter攞彩,發條短文講與中國貿易談判進展順利,連同今午放風比傳媒要求內閣起草美中貿易協議,全球股滙兩市大異動,離岸人民幣不足24小時人民幣由6.9805回升到6.88兌一美元,更帶掣恒指今日更狂抽過千點,創近十年最大單日升幅。

股市反彈勢兇夾狼,大戶散戶揸重倉講你都唔信,凡事停一停諗一諗冷靜啲部署。首先特朗普經常賴賬,誠信是近乎零,慣性隨口噏當秘笈。第二要留意今晚美國非農數據,萬一差過預期個市可以反轉。第三是留意油價,尤其市場風險降温,美元應聲跌,股市狂抽,既然憧憬貿戰好轉,油價卻彈都唔彈,竟然話驚全球產量升需求消化唔切,隔夜要挫2%,神奇乎?

另外,要睇埋蘋果出咗業績後股價反應,尤其隔晚蘋果業績一如筆者預期與市場有落差,更重要是將來不再公布銷售iPhone數字(有分析認為銷售未來會轉差,所以不再公開數字),盤後股價隨即掟散,最低見過205.16美元,連市值一萬億美元也不保,亦有大行開始降目標價,要睇實這個在大跌市被稱為最後防線的股份表現。

整括來講,筆者暫時觀點是中性偏淡,特別是中期選舉正在進入倒數階段,不排除民主黨有心人會壓住個市挫共和黨銳氣,加上聯儲局對息口後向仍偏鷹,現高追個股無謂,造淡又驚挾死,倒不如企定定喺度,乜都唔駛做。

編按:作者尹德政(Ricky),醉心投資美股近十載,最大滿足感來自尋找抵買有實力的世界行業領袖,每逢周三、五在「信報網站」及「港股360」撰文,另每逢周二在《信報》撰寫「政觀其辯」。

[email protected]