« 返回前頁列印

即巿股評 | 2017-09-13 11:25

【輪證贏家】恒指樹懶mode

放大圖片

噚日對住個恒指圖無乜方向,左睇右睇畫畫吓就喺日線圖畫咗個疑似「雙頂」嘅走勢出嚟,但基於其他技術指標都未有明確指引,所以暫作觀察;做完嘢開完會之後,望望個鐘原來收咗市,再開返個圖睇,又係寫咗個「一」字,好彩無買嘢,如果唔係波幅唔輸死,悶都悶死。

今日坐地鐵或返到公司時,你望吓你隔離左右嘅人,特別是IT界潮人,可能一個二個變晒國寶,事關噚晚凌晨Apple發布iPhoneX,最平都要8000幾蚊,消息一出由噚晚到依家啲新聞都圍繞住部機;到今朝港股開市,電視台第一條alert就係「手機股普遍向下,高偉電子、丘鈦科技早段跌逾5%」,而我今朝都搞呢單嘢,搞到10點38分(即係依家)我先至有少少時間開圖睇市打稿。

恒指5分鐘圖上見到恒指今早開市向下衝後,至10點18分最低見過27751點,及後回穩,現報27830點,跌141點,不過今日一跌都仲未完全補返星期一(9月11日)個上升裂口。日線圖上恒指低位一度失守10天線(27797點)水平,咁好明顯三兩吓手勢又失而復得啦,anyway恒指一日處於保歷加上升通道裏面運行,就一日都叫做keep到個上升走勢。不過下方技術指標一如昨日,無咩異樣,所以都係直接開恒指牛熊證街貨圖睇。

依家10點46分,恒指報27832點。上方熊證重貨區仍然係28200至28299點,有相當於1148張期指,由現價向上行到呢個兼食得晒啲街貨嘅話,就要向上行多467點,連同經過嘅重貨區嘅期指張數,夾埋total有1737張期指可以食到。

再睇下方牛證,最重貨係27300至27399點,有相當於1311張期指,如果要行到落嚟呢個位嘅話,就要大市向下再郁多532點,呢個點數睇落去好似好多咁,但其實同向上行食熊證重貨區只係爭65點咋喎。再講,牛證最貼價嘅27800至27899點嗰520張期指一早被食清,變相依家最貼價嘅係27700至27799點,呢度有414張期指。

唔睇咁遠,就當個市以樹懶咁嘅速度行,咁點都要邊走邊吃,熊證最貼價嘅係28000至28099點,呢度得40張期指,如果要向上行食熊證重貨嘅話,先要捱餓,捱百零點爬到上28000點就可以食件頭盤先,至後先至到主菜,然後一直咁向上食到重貨區。至於下行嘅話,由於最貼價嘅範圍都有成414張期指,基本上你擘大個口嘅話,塊光酥餅就已經係咀邊,只要你肯咬一下就可以食到塊餅啦,如是者再慢慢向下行嘅話,由27699至27400呢三個範圍夾埋都有930張期。輕手啲食到落27600至27699點,其實都只係踩住條20天線(27671點)附近之嘛,恒指熊(67279),收回價28300點,遠距遠小注試試佢。

作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]