« 返回前頁列印

即巿股評 | 2017-04-21 13:11

【盤房來料】科網股要唞唞 大市難彈得高

放大圖片

噚日以為港股受制條50日線,誰知一個屈尾十,下半場就突破障礙,全日倒升超過200點,重上二萬四關。噚日港股強勁嘅走勢好似已預知隔晚歐美股市上升,今日港股再向上,今日同樣遇到阻力,只係今次阻力係10日線(24134點)。恒指高開86點後,一度升133點見過24190點半日高位。以為10日線成功收復,豈料高開低走,半日落過最低24054點,中午收市報24075點,僅升18點;國指則報收10061點,升5點。

之前走勢嘅內銀股同內險股,隨住內地股市靠穩而略為回升,不過升幅有限,未能帶動大市再向上挑戰阻力。友邦(01299)下周派季度成績表前,得到高盛上調目標價,股價升0.3元。至於噚日表現突出嘅重磅藍籌股騰訊(00700)跟吉利汽車(00175),都係先升後回。騰訊曾創239.6元新高,但睇番日線圖,呢一浪最盡升到240.5元行人止步,卒之未行到盡頭,股價已掉頭回落,半場倒跌0.6元,報收236元。吉利半日亦回吐2.1%,成為最大跌幅藍籌股。

科網股個別發展,蘋果概念股升勢有餘未盡,瑞聲(02018)再創106.9元新高後,升幅略為收窄至3.4%,半場報收105.8元,係上半場表現最好藍籌股。至於阿Man愛股舜宇光學(02382),同樣創61.75元上市新高,半日升2.3%報收60.9元。小心呢對創完新高嘅孖寶,命運同騰訊一樣,去到今次個浪頂又要回頭唞唞氣,話就話破頂唔估頂,搵幅日線圖度一度,舜宇呢浪最多去到64.5元;而瑞聲基本上已到晒價,隨時要抖氣掉頭,見好即收唔好太貪心,吼回吐再吸納炒多轉。

少咗科網股發力,大市可能彈完又再停落嚟,今個月結算之前唔會有太大變化,講過大市因為大戶做晒short option,等收期權金唔會向上或向下突破,總之鎖死喺23800至24500個range裡頭,大戶都係立於不敗之地。相信期貨炒鬼要有心理準備,轉戰下一個月份。

至於搵到救星嘅有線寬頻(01097),成功引入由純官做大股東嘅永升(亞洲)做大股東,今日復牌。不過公司缺水需要注資,公司透過供股集資,每3股供5股,供股價每股0.21元,較停牌前0.61元大幅折讓66%。今早復牌股價曾低見0.46元,由於停牌前曾彈咗一浸,家陣回番去五毫幾子都算合理。今次有線變相賣殼,公司逃過執笠命運,不過公司個收費電視牌照能否成功續期,仲要過政府一關,況且注資後,唔等於公司營運唔代表一定有改善,即使股價唔會再插水落到供股價,亦唔好期望可以彈得去邊。

麥狄文

(徐狄怡‧證監會持牌人)