« 返回前頁列印

即巿股評 | 2017-04-03 13:09

【盤房來料】水泥股受惠價格及需求回升

放大圖片

承接上周五晚港股喺ADR升勢,恒指今早高開124點,升幅一度收窄至50點,回落至24162點半日低位後又再發力,半日最多升142點,見24253點高位。不過港股通暫停,少咗北水支持,港股升勢受阻,半場升勢回順,恒指中午報收24178點,升66點;國指則升24點,半場收10297點。

過往四月港股都係升多過跌,睇番資料統計,過往20年嘅4月,當中超過七成上升。不過今年可能有例外,皆因港股喺第一季已升咗一成,當中未見過較顯著調整,唔排除喺呢個只有17個交易日嘅4月,進行一次較深度調整。加上今個月除咗米字旗國啟動脫歐之外,又有法國大選,「習特會」等等,多個可能影響投資市場嘅因素,借勢調整嘅藉口多的是。

不過阿Man始終睇好今年港股有條件創新高,喺市底較強嘅情況下,即使調整亦未必會好多,恒指10日線(24312)似乎變成阻力,但50日線(23797)應有頗大支持,即係今次即使失守20日線(24110),恒指回落至23800水平差不多。不過呢個位一旦失守,23500點未必守得住,再插深啲有機會見23200水平,只係23500點好友應會力守。
重磅股方面,中行(03988)派完成績表,去年業績略遜市場預期,仲要畀大行調低評級,難免捱沽,其他內銀股則隨大市上升。騰訊(00700)、中移動(00941)跟港交所(00388)均見上升支撐大市,可惜都係高開後乏力,假期前好難再有突破。

中央表示喺河北設立雄安新區,係繼深圳同上海之後,另一個特區,資金即湧入相關概念股,包括基地喺京津嘅金隅(02009),勁升逾四成,天津港(03382)亦升16%,就連基地位於當地嘅長汽(02333)亦上升。對於呢啲炒概念嘅股份急升,阿Man認為今早買到貨當然講聲恭喜,但無貨喺現價再高追似乎唔多划算,尤其係金隅留低咁大個上升裂口,家陣再追風險高。

金隅急升四成高追有風險,不如睇番其他水泥股,華北地區跟京津冀地區需求將回升,水泥價格看可睇好一線。水泥股全線做好,中建材(03323)升10.8%;安徽海螺(00914)升3.6%;西部水泥(02233)升2.7%;華潤水泥(01313)升2.1%;亞洲水泥(00743)升5.2%,咁多水泥股花多眼亂,要阿Man揀都係睇番晒士大嗰幾隻,中建材、海螺同華潤水泥。

麥狄文

(徐狄怡‧證監會持牌人)