« 返回前頁列印

即巿股評 | 2015-08-06 12:48

【盤房來料】無股好炒都唔好炒垃圾

放大圖片

阿爺出盡法寶救市,可惜朝令夕改嚇親投資者,未能挽回缸邊友信心,上證指數僅升一日又腳軟,今日再跌12點,3600點是否堅不可摧嘅鐵底,真係要睇國家隊仲有冇充足子彈掃貨。港股梅花間竹上落,講嚟講去又係range trading,死又唔斷氣,翻生又乏力,總之就係搵食艱難。

噚日講過馬斯葛(00136)炒鬼多損手,奇怪係仲有炒鬼埋去玩,死心不息想報仇。口痕友話個市炒到無嘢好炒,明知隻股已經派發完畢無乜好憧憬,偏偏隔日就拎出嚟落鑊。好似阿Man早已宣布死亡嘅新確科技(01063),早已打回原形落番幾個月前炒上嘅起步位,三兩日就有炒鬼挑起戰火入場你推我湧,今早升16%,望嚟望去又係熟口熟面嗰堆經紀牌,炒鬼爛炒唔忿輸,若然閣下同阿Man一樣,能夠喺上月股災前全身而退,真係唔會亂咁衝入去陪人癲。

講一講冷門股亞洲果業(00073),公司繼上月中公布原大股東兼前主席唐宏州成手貨過咗底畀公司CEO,呢個去年3月先獲委任嘅CEO搖身一變成為第一大股東兼CEO兩職,公司應該會有後着。最近呢位CEO,更再獲委任為董事會主席,即係進一步坐正,以後大權在握,公司要進行改革更為得心應手,又即管將此股列入觀察名單,睇睇呢位身兼數職嘅新舵手,會唔會令沉寂已久嘅亞果脫胎換骨。

麥狄文