« 返回前頁列印

即巿股評 | 2015-08-05 12:49

【盤房來料】馬斯葛成交活躍 炒鬼卻十炒九輸

放大圖片

之前阿Man講過上證3600點國家隊要護盤,果然落到該水平,阿爺再度發功,將融券交收改為T+1,券商亦配合減少接受融券交易,噚日成功刺激上證指數回升。不過朝令夕改唔係挽回投資者信心嘅良方,今日上證又回軟,上半場跌逾1%。

好彩港股未被拖累,恒指跟國指均見上升,可惜成交照舊奀豬豬,上半場成交金額又唔夠400億元。靄華押業(01319)除淨日即炒上創52周新高,噚日急升今日難免有回吐,但仍守住0.8元反映唔係太多沽盤急住食胡。

馬斯葛(00136)周一復牌引入QQ(00700)同恒大(03333)兩個重量級大孖沙,惹來缸邊友無限憧憬,結果周一開始衝入去,可以話被一網打盡。連續三個交易日成交幾億股,可見炒鬼喺無其他選擇下,全部衝晒入去參與炒作。阿Man就完全無炒過,只要睇到兩個大孖沙0.006元入股價,已經無興趣。0.006元入股,即係1仙都唔使,衰啲講句港股最低沽出價係1仙,唔係普通大折讓入股,係無敵無得輸價。加上缸湖傳聞馬斯葛停牌前,街貨早已被收乾,暗地裡由有心人全部持有,街貨低過5%,復牌之後咁大成交,好明顯有心人已開始派發。而馬斯葛發行股數係天文數字幾百億股,家陣市值已過百億,除非QQ同恒大真係落實任何注資,否則短炒要嚴守止蝕,咪諗住有大孖沙入咗場就放心再坐一會。

麥狄文