« 返回前頁列印

即巿股評 | 2015-08-04 12:58

【盤房來料】靄華拆細擺明繼續炒

放大圖片

港股悶局未能打破,恒指開波更跌逾百點,幸而喺內地股市反彈逾1%帶動下,恒指跌幅收窄,國指收復失地倒升些少,不過成交仍然疲弱,上半場唔夠400億元。

商品價格日復日跌,唔少專家話商品市場步入熊市,甚至可能出現災難式下跌。商品市場搞成咁,除咗係美元加息日子步近拖低金價,連累其他商品價格下跌之外,油價自去年起走弱,係帶動商品市場步入熊市嘅始作俑者。油價每況愈下益咗航空股,國航(00753)、東航(00670)同南航(01055)三架飛機齊齊起飛,除咗受惠油價低迷,東航之前引入達美航空成為策略投資者,令投資者憧憬整個板塊加快進行混改,喺目前市況中,叫做有個掃貨理由。至於架本地飛機國泰(00293),當然亦有上升,不過近日屢見負面新聞傳出,加上被廉航追打,要揀航空股寧買內地航空股。而東航除已有達美溢價入股外,今年浦東機場新跑道啟用,明年上海迪士尼開幕,都令東航較其他兩個對手更吸引。

唔係賣花讚花香,自從「708」股災之後,阿Man已好一段日子冇推介股份,靄華押業(01319)係少數阿Man推介嘅心水股。之前阿Man講過靄華本身業務發現理想,估值又唔貴,仲有VP呢個金手指基金入股,肯定大有錢途。以前買賣兩閒交投較疏落唔啱炒,但公司宣布一送三紅股變相拆細,點都會落鑊。今日除淨拆細即炒,上半場升近三成為升幅榜冠軍。最重要係沿途升上嚟大把機會上車,完全唔係暴力炒上嗰隻,好明顯唔係得炒鬼你推我湧。拆細前股價調整落到20日及50日線,今朝裂口高開一口氣收復幾條移動平均線,呢啲走勢好快又創新高。

麥狄文