« 返回前頁列印

即巿股評 | 2015-06-02 12:29

【盤房來料】中國星批完股無理由唔大炒

放大圖片

噚日收市期指博命隊,已預示今日大市唔多掂,加上龍頭股港交所(00388)被調低評級至持有,龍頭大哥腳軟隊咗六個幾,大部份重磅股都齊齊過堂。雖然指數跌二百點唔算太多,不過成千一隻股份下跌,呢吓真係要提高警覺性,相信六月同五月份一樣咁難搞,繼續炒股唔炒市。

羅馬集團(08072)連升三日,今日升穿轉角位大把炒鬼等食糊,三個交易日股價已倍升,阿Man唔認為呢啲位值得追貨。反而剛剛宣布以0.12元批股嘅中國星(00326)有得諗,早段股價曾被搶高至0.152元,其後升勢回順至0.144元上半場收工。若以0.12元批股價計炒高一倍係指定動作,即係話現價買仲有大把水位,不過現價正處於重貨區,需要些少時間消化,能夠升穿0.15元企穩,要炒上兩粒神冇難度。

等足一個星期,正道(01188)終於開車,雖然只係短短一個星期,對於炒鬼嚟講好似等咗成個世紀。正道上星期五加入MSCI小型股指數已見買盤追捧,今日發力開快車,股價勁升兩成幾,橫行咁耐剛開車,目標價1元唔係隨口講,不過距離目標仲有好遠路程,六粒神附近不妨減減磅食啲糊兼游水。坪山茶業(00364)一向模式係升兩日抖一日,今日未能衝破尋日高位,之前又再升兩日,擺明又要抖一抖,仍未脫離之前炒作模式。不過坪山既已脫離仙班,應該可逐步向住兩粒神目標努力。君陽太陽能(00397)果然完成供股翻炒,股價抽成一成盤中高見0.405元,估計今轉至少平番之前高位,聽聞目標係六粒神,即較現價仍有五成升幅,好彩阿Man買定貨等到開車。

麥狄文