« 返回前頁列印

即巿股評 | 2015-05-27 12:30

【盤房來料】國藏儲夠貨開車等好消息

放大圖片

外圍股市風雨飄搖,連內地股市呢隻狂牛都要停一停,港股威咗一日今日又打回原形,重返二萬八關附近,跌逾百點。至於股仔則個別發展,升幅榜冠軍又係由內地炒股網格隆滙推介嘅國聯通信(08060),股價裂口高開0.45元,最高見0.48元升逾七成,好老實U盤追入夠快手仲有餐食,走遲半步又係得個坐字。

阿Man上周叫收集嘅位元堂(00897),今日另有行家賞識推介,股價最高見0.177元後升勢回順,上半場喺0.169元附近徘徊,睇嚟要消化一吓啲食糊貨。不過阿Man認為位元堂只係剛剛起步,尤其已升破0.16元企穩,下一個目標可以挑戰兩粒神,上半場收集一段時間,或者下半場再炒番上去。至於行家超牛睇三四毫,亦唔係無可能,只不過係需要時間去實踐。

國藏(00559)聽聞快有好消息公布,股價吽咗成個月今早見突破,升破一個月前高位高見0.62元,消息話呢件係大製作,第一站先見1元,終極要睇兩皮。如果有留意國藏轉手後得股壇猛人入股,應該相信此股確值得投信心一票。皆因呢個新股東蔡朝暉係雲鋒基金始創人之一,更與馬雲、史玉柱同陳義紅份屬好友,能夠有咁0既陣容,國藏炒100億市值亦唔過份。

麥狄文