« 返回前頁列印

即巿股評 | 2015-05-12 12:32

【盤房來料】謝霆鋒個名有冇趙薇咁值錢?

放大圖片

阿爺份母親節禮物似乎對港股起唔到作用,尋日高開低走,今日再跌回落27700點水平之下。人地上證指數連彈兩日,港股完全跟唔上,大戶明顯想放過追咗貴貨班大好友。至於二三線股仔因為恩達(01480)事件而收歛炒作,缸邊友埋怨恩達陀衰家,搞到股仔無啖好食。

恩達反咗艇,冧巴先有一字之差嘅新股滴達(01470)就較招股價勁升逾七成,不過開市價1.16元同現價差無幾,盤中最高見1.23元,今日先上車冇肉食,IPO認一手人人有份,睇嚟都順利落車食埋糊。

國美電器(00493)噚日下半場係威係勢,炒高至2.3元高收,可惜今日無以為繼,再一次引證此股有幾難炒,阿Man對付佢嘅策略係待回吐收集,打死唔高追。尋日將北亞資源(00061)列入觀察名單,噚日午後一度高見0.405元,一步之距未能衝破0.41元高位,阿Man唔心急追貨,反而今日股仔調整,此股喺0.38元水平頂得吓,考慮呢個位先上車買定貨底,等破頂再加注,上望目標0.7元。

謝霆鋒隻漢傳媒(00491)炒高批股後竟然死唔去,以每股0.81元批股,雖然股價上月喺六粒神起步,現價幾乎升一個開,但去到家陣市值仍未過廿億,即使多咗兩成新股亦只係廿幾億市值,呢個晒士啱晒落鑊。趙薇嘅阿里影業(01060)可以炒到七百億市值,口痕友講笑話霆鋒個名值十份一都70億市值,即係仲有大把上升空間。阿Man唔敢質疑口痕友嘅大膽假設,只係「趙薇」由強國人做大廚主理,除非今次「謝霆鋒」批股引入強國人做大廚,否則參與炒作都要提高警覺。

麥狄文